Кыргыз Республикасынын Премьер-министри Мухаммедкалый Абылгазиев: «Үстүбүздөгү жылдын 9 айынын жыйынтыгы боюнча экспорт 1,3 млрд долларды түздү, бул өткөн жылды

Сүрөт интернеттен алынды

14-ноябрь күнү Кыргыз Республикасынын Премьер-министри Мухаммедкалый Абылгазиев:«2019-жылы республиканын ИДПсы 2018-жылга салыштырмалуу туруктуу өсүштү көрсөтүүдө», - деп Кыргыз Республикасынын Жогорку Кеңешинин жыйынында айтты. Бул тууралуу КРдин Өкмөтүнүн Аппаратынын маалыматтык камсыздоо бөлүмү билдирди.

Өкмөт башчы эгерде 2018-жылы өсүш 3,5%ды түзсө, 2019-жылдын 9 айынын жыйынтыгы боюнча 6,1%ды түзүп, ЕАЭБдеги жакшы көрсөткүч болгонун кошумчалады.

Анын айтымында, үстүбүздөгү жылдын 9 айынын жыйынтыгы боюнча экспорт 1,3 млрд долларды түздү, бул өткөн жылдын деңгээлинен 11,7%га жогору. Импорт 7,3%га төмөндөдү. Өкмөт тарабынан ата мекендик экспорттук продукцияларды өндүрүүчүлөрдү колдоо, импорттун көлөмүн азайтуу боюнча иштер жүрүүдө. Бул саясат мындан ары карай дагы улантылат.

Мухаммедкалый Абылгазиев чет элдик түз инвестициялар тууралуу айтып жатып, 2019-жылдын 6 айынын ичинде 394 млн АКШ доллары инвестиция тартылып, 2018-жылдын 6 айына салыштырмалуу 59,4%га жогору болгонун билдирди. Мындан тышкары үстүбүздөгү жылдын 9 айында өлкөгө 90 млрд сом инвестиция тартылган, бул 2018-жылдын деңгээлинен 6,3%га көп болду.

«Кыргыз Республикасынын Президентинин өлкөнүн тышкы карызын өстүрбөө боюнча саясаты – коомчулукта чоң колдоо таап жатат. Бул багытта Өкмөттүн тышкы карыз боюнча ишин өзгөчө белгилеп кетким келет. Тышкы карызда 2018-жылдан баштап ИДПга карата тышкы карыздын алгачкы жолу туруктуу төмөндөө тенденциясы орун алды. Эгерде 2017-жылы ИДПга карата тышкы карыздын көлөмү 54% болсо, 2018 – 48% болгон. Ал эми 2019-жылы – 46,5%га чейин жеткирилет. Ички резервдерди натыйжалуу пайдаланып, ашыкча чыгашаларды кыскартуу менен, тапкан каражаттар менен жашоого үйрөнүшүбүз керек деген Өкмөттүн позициясы туруктуу. Бул – бюджет тармагындагы негизги стратегия», – деди Мухаммедкалый Абылгазиев.